തിരുവനന്തപുരം: കേരളത്തിന്റെ പ്രധാന വരുമാന സ്രോതസായ ബെവ്റേജസ് കോര്‍പറേഷന്റെ കഴിഞ്ഞ വര്‍ഷത്തെ നഷ്ടം 1608.17 കോടി രൂപ. ഏറ്റവും അധികം നഷ്ടമുണ്ടാക്കുന്ന സംസ്ഥാനത്തെ പൊതുമേഖലാ സ്ഥാപനങ്ങളുടെ പട്ടികയില്‍ മൂന്നാം സ്ഥാനത്താണ് ബെവ്റേജസ് കോര്‍പറേഷന്റെ സ്ഥാനം. തൊട്ട് മുന്‍വര്‍ഷം 180 കോടി രൂപ ലാഭത്തില്‍ ആയിരുന്ന സ്ഥാപനമാണ് ഇക്കുറി നഷ്ടത്തിലേക്ക് കൂപ്പുകുത്തിയത്. കൊവിഡിനെ തുടര്‍ന്ന് ഔട്ട്ലെറ്റുകള്‍ പ്രവര്‍ത്തിക്കാതിരുന്നതാണ് നഷ്ടത്തിലേക്ക് നയിച്ചത്. ആകെ വിറ്റുവരവ് 4134.93 കോടിയില്‍ നിന്ന് 2527.69 കോടിയായി ആണ് ഇടിഞ്ഞത്. നഷ്ടക്കണക്കില്‍ ഒന്നാമത് കെഎസ്ആര്‍ടിസി തന്നെയാണ്. 1976.03 കോടി രൂപയാണ് കെഎസ് ആര്‍ടിസിയുടെ നഷ്ടം. 1822.35 കോടി രൂപ നഷ്ടവുമായി കെഎസ്ഇബി ആണ് രണ്ടാമത്. കേരള വാട്ടര്‍ അതോറിറ്റി (594.11 കോടി) കെടിഡിഎഫ്സി (63.30 കോടി) എന്നിവയാണ് നഷ്ടക്കണക്കില്‍ നാലും അഞ്ചും സ്ഥാനങ്ങളില്‍. ഒരു വര്‍ഷം കേരളത്തിലെ പൊതുമേഖലാ സ്ഥാപനങ്ങള്‍ ഉണ്ടാക്കുന്ന നഷ്ടം 6000 കോടിക്ക് മേലെ ആണ്. ബഡ്ജറ്ററി സപ്പോര്‍ട്ട് ആയി 7000 കോടിക്ക് മേലെ കൊടുക്കുന്നുമുണ്ട്. അതില്ലായിരുന്നെങ്കില്‍ മൊത്തം നഷ്ടം 13000 കോടിക്ക് മേലെയാകും. അതായത് ഓരോ ദിവസവും പതിനേഴു കോടിയോളം നഷ്ടം. കെഎസ്ആര്‍ടിസിയും കെടിഡിഎഫ്സിയും കൂടി ദിവസവും ആറു കോടി രൂപയോളം നഷ്ടം ഉണ്ടാക്കുന്നുണ്ട്. ഇതിന് പുറമെയാണ് 400 കോടിക്ക് മേല്‍ ബാധ്യതയുള്ള ഹിന്ദുസ്ഥാന്‍ ന്യൂസ്പ്രിന്റ് കേരളാ സര്‍ക്കാര്‍ ഏറ്റെടുത്തത്. കേരളത്തില്‍ 150 കോടിക്കുമേല്‍ ലാഭമുള്ള ഒരു പൊതുമേഖലാ സ്ഥാപനം പോലും ഇല്ല. 63 പൊതുമേഖലാ സ്ഥാപനങ്ങള്‍ ചേര്‍ന്ന് 6,569.25 കോടി രൂപ നഷ്ടമാണ് കഴിഞ്ഞ വര്‍ഷം ഉണ്ടാക്കിയത്. മുന്‍വര്‍ഷം ഇത് 1738.25 കോടി രൂപ ആയിരുന്നു. അതേ സമയം ലാഭത്തില്‍ പ്രവര്‍ത്തിക്കുന്ന 50 സ്ഥാപനങ്ങള്‍ ചേര്‍ന്ന് നേടിയ ലാഭം വെറും 513.79 കോടി രൂപ മാത്രമാണ്. ലാഭത്തില്‍ മുന്‍വര്‍ഷത്തെ അപേക്ഷിച്ച് 369.21 കോടിയുടെ കുറവാണ് ഉണ്ടായത്. ലാഭക്കണക്കില്‍ ഒന്നാം സ്ഥാനത്ത് കെഎസ്എഫ്ഇ ആണ്. 146.41 കോടിയാണ് കെഎസ്എഫ്ഇയുടെ ലാഭം. 100 കോടിക്ക് മുകളില്‍ ലാഭമുള്ള ഏക സ്ഥാപനവും കെഎസ്എഫ്ഇ ആണ്. 58.28 കോടി ലാഭവുമായി കേരള മിനറല്‍സ് & മെറ്റല്‍സ് ആണ് രണ്ടാമത്. കേരള ഫീഡ്സ് (36.07 കോടി), കെഎസ്ഐഡിസി( 26.62 കോടി), കേരള സ്റ്റേറ്റ് ബാക്ക്വേര്‍ഡ് ക്ലാസ് ഡെവലപ്പ്മെന്റ് കോര്‍പറേഷന്‍ ( 23.60 കോടി) എന്നിവയാണ് ആദ്യ അഞ്ചിലുള്ള മറ്റ് സ്ഥാപനങ്ങള്‍.
Source Livenewage
