2016ല് പുറത്തിറക്കിയ ഗോള്ഡ് ബോണ്ടിലെ നിക്ഷേപം പിന്വലിക്കാന് റിസര്വ് ബാങ്ക് അനുമതി നല്കി. എട്ടുവര്ഷമാണ് കാലാവധിയെങ്കിലും അഞ്ചുവര്ഷമെത്തിയാല് പിന്വലിക്കാന് ബോണ്ടില് വ്യവസ്ഥയുണ്ട്.
ഫെബ്രുവരി എട്ടിന് അഞ്ചുവര്ഷം പൂര്ത്തിയായതിനാലാണ് നിക്ഷേപം പിന്വലിക്കാനുള്ള അവസരം ലഭിച്ചത്. ഒരു ഗ്രാമിന് തുല്യമായ ബോണ്ടിന് 4,813 രൂപയാണ് പിന്വലിക്കല് തുകയായി നിശ്ചയിച്ചിട്ടുള്ളത്. 2,600 രൂപ നിലവാരത്തിലായിരുന്നു 2016 ജനുവരിയില് ഈ ഗോള്ഡ് ബോണ്ട് പുറത്തിറക്കിയത്. ഇതുപ്രകാരം നിക്ഷേപതുകയില് 85ശതമാനമാണ് വര്ധന.
മുന്ആഴ്ചയിലെ(തിങ്കള്-വെള്ളി) 24 കാരറ്റ് സ്വര്ണത്തിന്റെ ക്ലോസിങ് നിരക്കിന്റെ ശരാശരിയെടുത്താണ് വില നിശ്ചയിക്കുക. ഇതുപ്രകാരമാണ് അഞ്ചുവര്ഷമെത്തിയ ഗോള്ഡ് ബോണ്ട് യൂണിറ്റിന്റെ വില നിശ്ചയിച്ചിട്ടുള്ളത്. ഇന്ത്യ ബുള്ളിയന് ആന്ഡ് ജുവലേഴ്സ് അസോസിയേഷന്റെ വിലയാണ് ഇതിനായി പരിഗണിക്കുക.
ഫിസിക്കല് രൂപത്തിലുള്ള സ്വര്ണത്തിനു പകരമായാണ് സര്ക്കാരിനുവേണ്ടി റിസര്വ് ബാങ്കാണ് ഗോള്ഡ് ബോണ്ട് പുറത്തിറക്കുന്നത്. അഞ്ചുവര്ഷം പൂര്ത്തിയായാല് അന്നത്തെ വിലയ്ക്ക് ബോണ്ട് തിരികെകൊടുത്ത് പണമാക്കാം. എട്ടുവര്ഷം പൂര്ത്തിയായശേഷമാണ് നിക്ഷേപം പിന്വലിക്കുന്നതെങ്കില് ലഭിക്കുന്ന ആദായം പൂര്ണമായും നികുതി വിമുക്തമാണ്.
മൂലധനനേട്ടത്തിനുപുറമെ, 2.5ശതമാനം വാര്ഷിക പലിശയും നിക്ഷേപകര്ക്ക് ലഭിക്കും. വര്ഷത്തില് രണ്ടുതവണയായി പലിശ ബാങ്കില് വരവുവെയ്ക്കുകയാണ് ചെയ്യുക. ഈതുകയ്ക്ക് ആദായനികുതി ബാധ്യതയുണ്ട്. മൊത്തം വരുമാനത്തോടു ചേര്ത്താണ് ഓരോ വര്ഷവും ആദായ നികുതി നല്കേണ്ടത്
Source : NEWAGE
