ബെംഗളൂരു: സോഫ്റ്റ്ബാങ്ക് പിന്തുണയുള്ള ഇൻമൊബിയുടെ ഉടമസ്ഥതയിലുള്ള ലോക്ക്സ്ക്രീൻ പ്ലാറ്റ്ഫോമായ ഗ്ലാൻസ്, ഇന്ത്യൻ ഗെയിമിംഗ് കമ്പനിയായ ഗാംബിറ്റ് സ്പോർട്സിനെ ഏറ്റെടുത്തതായി പ്രഖ്യാപിച്ചു. വിപണിയിലുടനീളമുള്ള ജൻ-Z-ന് വേണ്ടി എൻഎഫ്ടി അടിസ്ഥാനമാക്കിയുള്ള തത്സമയ ഗെയിമിംഗ് അനുഭവങ്ങൾക്കായി ഏറ്റവും വലിയ പ്ലാറ്റ്ഫോം നിർമ്മിക്കാനുള്ള ഗ്ലാൻസിന്റെ അഭിലാഷത്തെ ഇത് ത്വരിതപ്പെടുത്തും. എന്നാൽ ഇടപാടുകളുടെ സാമ്പത്തിക വിശദാംശങ്ങൾ ഇതുവരെ വെളിപ്പെടുത്തിയിട്ടില്ല.
ഈ ഏറ്റെടുക്കൽ ഗ്ലാൻസിന്റെ സ്കെയിലും ലോക്ക് സ്‌ക്രീൻ കേന്ദ്രീകൃത നവീകരണവും ഗാംബിറ്റിന്റെ ഗെയിമിംഗ് ഇക്കോസിസ്റ്റത്തെക്കുറിച്ചുള്ള ധാരണയും വൈദഗ്ധ്യവും ഒരുമിച്ച് വരുന്നത് കമ്പനിക്ക് നേട്ടമാണ്. ഗ്ലാൻസിന്റെ ലോക്ക് സ്‌ക്രീൻ ഗെയിമിംഗ് പ്ലാറ്റ്ഫോമായ ഗ്ലാൻസ് ഗെയിംസ് വഴി ഗെയിമിംഗ് സെഗ്‌മെന്റിൽ ഗ്ലാൻസിന് ഇതിനകം തന്നെ സാന്നിധ്യമുണ്ട്, കൂടാതെ ഏഷ്യയിലുടനീളം 45 ദശലക്ഷത്തിലധികം പ്രതിമാസ സജീവ ഉപയോക്താക്കളുമുണ്ട്. ഇവരുടെ ഉപയോക്താക്കളിൽ 70 ശതമാനത്തോളം പേരും 18 മുതൽ 34 വരെ പ്രായമുള്ളവരാണ്.
പ്ലാറ്റ്‌ഫോമുകൾ നിർമ്മിക്കുന്നതിൽ ആഴത്തിലുള്ള അനുഭവപരിചയമുള്ള ഒരു ടീമാണ് ഗാംബിറ്റിനുള്ളത്. 2015 ൽ യശശ്വി തകല്ലപള്ളി, ഗൗരവ് കോനാർ, രണവീർ സങ്കിനേനി, ദീപക് വെങ്കിട്ടരമണി എന്നിവർ ചേർന്ന് സ്ഥാപിച്ചതാണ് ഗാംബിറ്റ്. ഫാന്റസി സ്‌പോർട്‌സ്, പോക്കർ, റമ്മി, ക്വിസ്, ഹൈപ്പർ-കാഷ്വൽ ഗെയിമുകൾ എന്നിവയുള്ള വളരെ ജനപ്രിയമായ ഗെയിമിംഗ് പ്ലാറ്റ്‌ഫോമാണിത്. ഗാംബിറ്റിന് ഏകദേശം 10 ദശലക്ഷത്തോളം രജിസ്റ്റർ ചെയ്ത ഉപയോക്താക്കളുണ്ട്. ലോക്ക് സ്‌ക്രീനിൽ ടൂർണമെന്റുകൾ, ഗെയിം ഷോകൾ, ഗെയിം സ്ട്രീമിംഗ്, മൾട്ടി-പ്ലേയർ ഗെയിമുകൾ എന്നിവയുൾപ്പെടെ വളരെ ആകർഷകമായ തത്സമയ ഗെയിമിംഗ് അനുഭവങ്ങൾ സമാരംഭിക്കുന്നതിന് ഗാംബിറ്റിന്റെ വൈദഗ്ദ്ധ്യം ഗ്ലാൻസ് പ്രയോജനപ്പെടുത്തും. വരും പാദങ്ങളിൽ, ലൈവ് ഗെയിമിംഗിൽ എൻഎഫ്ടികൾ അവതരിപ്പിക്കാനും ഗ്ലാൻസ് പദ്ധതിയിടുന്നു
Source livenewage
