ലൈസൻസ് ഫീസിലും എസ്.യു.സി. നിരക്കിലും ഇളവ്, പ്രധാന ടെലികോം ഉപകരണങ്ങളുടെ നികുതി ഇളവ്, ടെലികോം ടവർ സംബന്ധമായ ജി.എസ്.ടി. ഇൻപുട്ട് ടാക്സ് ക്രെഡിറ്റ്, 5ജി റോൾഔട്ടുകൾക്ക് സുഗമമായ പരിഷ്‌കാരങ്ങൾ എന്നിങ്ങനെ ബജറ്റിൽ ടെലികോം മേഖലയിലെ നിക്ഷേപകരുടെ പ്രതീക്ഷകൾ ഏറെയാണ്. എന്നാൽ വിശകലന വിദഗ്ധരുടെ വിലയിരുത്തലിൽ നിക്ഷേപകരുടെ പ്രതീക്ഷകൾ അസ്ഥാനത്താണ്. ഇത്തവണ ബജറ്റിൽ മേഖലയ്ക്കായി വലിയ പ്രഖ്യാനങ്ങൾ ഒന്നും തന്നെ ഉണ്ടാകാൻ സാധ്യതയില്ല.
സർക്കാർ ലൈസൻസ് ഫീസ് മൂന്നു ശതമാനത്തിൽ നിന്ന് ഒരു ശതമാനമായി കുറയ്ക്കുകയും, മുൻകാല ലേലങ്ങളിൽ നേടിയ സ്പെക്ട്രത്തിന്റെ സ്പെക്ട്രം ഉപയോഗ നിരക്ക് (എസ്.യു.സി) നിരക്ക് മൂന്നു ശതമാനമായി കുറയ്ക്കുകയും ചെയ്യണമെന്നാണ് ഇതുവരെയുള്ള ആഗ്രഹ പട്ടിക. ഉപയോഗിക്കാത്ത 35,000 കോടി രൂപയുടെ ഇൻപുട്ട് ടാക്സ് ക്രെഡിറ്റ് റീഫണ്ട് ചെയ്യണമെന്ന് സെല്ലുലാർ ഓപ്പറേറ്റേഴ്സ് അസോസിയേഷൻ ഓഫ് ഇന്ത്യ (സി.ഒ.എ.ഐ) ആവശ്യപ്പെട്ടിട്ടുണ്ട്. ഇത് സമീപ ഭാവിയിൽ ഉപയോഗിക്കില്ലെന്നാണ് വിലയിരുത്തൽ. നിലവിലുള്ള 59,000 കോടി രൂപ ഒബ്ലിഗേഷൻ ഫണ്ട് (യു.എസ്.ഒ.എഫ്) കോർപ്പസ് അടുത്ത കുറച്ച് വർഷത്തേക്ക് യു.എസ്.ഒ. ലക്ഷ്യങ്ങൾ കൈവരിക്കാൻ പര്യാപ്തമായതിനാൽ, ഫണ്ട് താൽക്കാലികമായി നിർത്തിവയ്ക്കണമെന്നും ആവശ്യപ്പെട്ടിട്ടുണ്ട്.
ടെലികോം മേഖലയ്ക്കായി രണ്ടാംതരംഗത്തിനു ശേഷം സർക്കാർ പ്രഖ്യാപനങ്ങൾ നടത്തിയിട്ടുണ്ട്. കൂടാതെ ഉടനെ തന്നെ രണ്ടാമത്തെ പരിഷ്‌കാരങ്ങൾ പ്രഖ്യാപിക്കാൻ സർക്കാർ പദ്ധതിയിടുന്നതിനാൽ ബജറ്റിൽ വലിയ പ്രതീക്ഷകളൊന്നും പുലർത്തേണ്ടതില്ലെന്നാണ് എംകെ. ഗ്ലോബലിന്റെ വിലയിരുത്തൽ. അതായത് ടെലികോം ചാർജുകൾ ഉയരാൻ തന്നെയാണു സാധ്യത. ടെലികോം മേഖലയേക്കാൾ പ്രാധാന്യം ലഭിക്കേണ്ട മറ്റു നിരവധി മേഖലകളും സർക്കാരിനു മുന്നിലുണ്ട്.
സാധ്യതയുള്ള പരിഷ്‌കരണ നടപടികളിൽ ഭൂരിഭാഗവും ബിസിനസ് ചെയ്യൽ എളുപ്പമാക്കാൻ ലക്ഷ്യമാക്കി ഉള്ളതായിരിക്കുമെന്നും അതിനാൽ, ഈ മേഖലയ്ക്ക് വൈകാരികമായി അനുകൂലമായിരിക്കുമെന്നും എംകെ വിലയിരുത്തി. ബജറ്റിൽ മേഖലയ്ക്കായി വലിയ പരിഷ്‌കാരങ്ങളൊന്നും റേറ്റിങ് ഏജൻസിയായ മോർഗൻ സ്റ്റാൻലിയും പ്രതീക്ഷിക്കുന്നില്ല. 2021 സെപ്റ്റംബറിൽ സർക്കാർ ടെലികോം മേഖലയ്ക്കായി ഏറെ കാത്തിരുന്ന പരിഷ്‌കാരങ്ങൾക്ക് അംഗീകാരം നൽകുകയും പുനരുജ്ജീവന പാക്കേജ് പ്രഖ്യാപിക്കുകയും ചെയ്തിരുന്നു.
ക്രമീകരിച്ച മൊത്ത വരുമാനത്തിന്റെയും (എ.ജി.ആർ), സ്പെക്ട്രം കുടിശികയുടെ വാർഷിക പേമെന്റുകൾക്കു മൊറട്ടോറിയം ഉൾപ്പെടെയുള്ള പരിഷ്‌കാരങ്ങളിലൂടെ, ടെലികോം മേഖലയിലെ പണലഭ്യത പ്രശ്നങ്ങൾ സർക്കാർ വലിയ തോതിൽ പരിഹരിച്ചിട്ടുണ്ട്. അതേസമയം 4ജി നെറ്റ് വർക്ക് വിപുലീകരണം, 5ജി റോൾഔട്ടുകൾ, നിഷ്‌ക്രിയ അടിസ്ഥാന സൗകര്യങ്ങളുടെ ഗണ്യമായ വളർച്ച എന്നിവയ്ക്കായി ഈ മേഖലയിൽ ഒരു വലിയ തന്ത്രം ആവശ്യമാണെന്ന് കെയർ റേറ്റിങ്സ് വിലയിരുത്തുന്നുണ്ട്.
Source : Livenewage
